تاند (۲ شنبه، د حمل ۶ مه) د طالبانو د رژیم د عدلیې وزارت یوه مقام ملا احسان الله وثیق ادعا کړې، چې د دوی له بیا واک ته رسېدو سره تر ۲ میلیون جریبه پورې ځمکه د غاصبانو له منګولو ژغورل شوې ده.
نوموړی، چې د عدلیې وزارت د دولتي قضایاوو عمومي رئیس او د ځمکو د غصب د مخنیوي کمېسیون سکرتر دی؛ بلخ ولایت ته د یوه پلاوي په ملتیا د سفر پر مهال دا څرګندونې کړې دي.
د هغه په وینا، پر دې سربېره ۵۰۰ میلیونه افغانۍ، ۲۹ میلیونه ډالر او ۹ میلیونه یورو هم د دوی د رژیم لخوا راګرځول شوې او بیت المال ته سپارل شوي دي.
څو ورځې مخکې، د طالبانو د رژیم د عدلیې وزارت اړوند « د ځمکو له غصب څخه د مخنیوي او غصب شویو ځمکو د استرداد کمېسیون» په یوه اعلامیه کې د ځمکو غاصبانو ته خبرداری ورکړ، چې غصب شوې ځمکې خوشې کړي کنه په وینا یې جدي چلند به ورسره وشي.
له څه مودې راهیسې د طالبانو د عدلیې وزیر عبدالحکیم شرعي تورن شوی و، چې د پرځیدلي جمهوري نظام د ولسي جرګې د یو شمېر غړو په ګډون یې ځینې سیاسي څېرې بندیان کړي.
د طالبانو ځینو منتقدانو ان داسې ادعاوې هم کړي، چې ښاغلی شرعي په عدلیې وزارت کې دننه شخصي زندان لري، خو د هغه دفتر دا څرګندونې رد کړې وې.
ځینې څارونکي د ځمکو د غصب پر وړاندې د طالبانو د رژیم کړنې په ټوله کې ستایي، خو ټینګار لري چې په دغو کړنو کې باید د شخصي سلیقو، عقدو او استفادو مخنیوی وشي.