تاند (یکشنبه، د حمل ۵ مه) په نوي ډیلي کې د افغانستان سفارت چارواکو ویلي، چې د افغانستان، پاکستان او ایران لپاره د هندوستان د بهرنیو چارو وزارت استازي جي پي سینگ له دغه سفارت څخه لیدنه کړې.
په ممبیي کې د افغانستان د پرځیدلي جمهوري نظام کونسله، ذکیه وردګ چې اوس د افغان سفارت سرپرستي هم کوي؛ په خپله ایکس یا ټویټر پاڼه کې د دې لیدنې پر مهال د دواړو هېوادونو پر اړیکو د خبرو خبر ورکړی.
سرچینې په دې اړه نور توضیحات نه دي ورکړي.
دا لیدنه په داسې مهال کیږي، چې څو ورځې مخکې د افغانستان لپاره د امریکا ځانګړي استازي توماس ویسټ، هند ته د سفر پر مهال له جي پي سینګ سره د افغانستان پر وضعیت خبرې وکړې.
معلومه نه ده، چې هغوی دواړو څه سره وویل او اوس د هغو خبرو په دوام د افغانستان له سفارت څخه د جي پي سینګ لیدنه پر محور څرخېده.
څو میاشتې مخکې، په هندوستان کې د پرځیدلي جمهوري نظام سفیر فرید ماموندزي د افغان سفارت د تړلو اعلان وکړ او دلیل یې دوی سره د هند د دولت نه همکاري او په سفارت کې د طالبانو د رژیم د دیپلوماتانو د منلو لپاره ور اچول شوي فشارونه وګڼل.
د هندوستان د بهرنیو چارو وزارت بیا دغه ادعا رد کړه او ویې ویل، چې افغان دیپلوماتان تر ډېره نورو هېوادونو ته کډوال شوي او دوی یې پر ځای د سفارت واګې د هند په نورو ښارونو کې افغان دیپلوماتانو ته سپارلي.
له دې سره، څارونکي باور لري چې هندوستان د خپلو ټاکنو له ترسره کېدو وروسته طالب رژیم ته د افغان سفارت د سپارلو لارې چارې مساعدې کړې دي.