تاند (۵ شنبه، د حمل دویمه) د افغانستان په اړه د یو شمېر امریکایي جنرالانو د وروستیو څرګندونو په غبرګون کې، د طالبانو د رژیم ویاند ذبیح الله مجاهد ډاډ ورکړی چې نه امریکا او نه کوم بل هېواد ته د افغانستان له خاورې ګواښ پېښیږي.
هغه په خاص ډول، د داعش ډلې په تړاو ویلي چې دغه ډله په افغانستان کې ځبل شوې او هیڅ کوم هېواد ته د خنډ جوړولو وړتیا نه لري.
د چارشنبې په ورځ، د امریکا په کانګرس کې د امریکا د مرکزي قومندانۍ مخکیني قومندان د امریکا وتل د جمهوري نظام د سقوط یو لامل وباله. په دې غونډه کې دغه مخکیني امریکایي جنرال ادعا وکړه، چې طالبانو داسې ډلو ته پناه ورکړې چې پر امریکا متحده ایالتونو او امریکایي ځواکونو د برید په هڅه کې دي.
د طالبانو د واک لادې افغانستان په اړه ګڼې داسې نورې ادعاوې شوي، خو طالب رژیم رد کړي او د ځان خلاف یې تبلیغات ګڼلي دي.
طالب چارواکو په دې اړه د اسنادو غوښتنه هم کړې، چې کومه ډله په کومو امکاناتو د افغانستان له خاورې نورو هېوادونو ته ګواښ جوړوي.
په دې ترڅ کې، تر ټولو زیاته ناندرۍ د طالبانو د رژیم او پاکستان تر منځ ده او دغه هېواد په شدت سره د افغانستان په خاوره کې د پاکستاني طالبانو د موجودیت او له دې ځایه د پاکستان خلاف د بریدونو ادعا کوي، خو طالب چارواکي یې بې اساسه ګڼي.