تاند- هند په نړۍ کې د لمریزې انرژۍ تر ټولو ستر برېښناکوټ جوړوي.
دا برېښناکوټ، چې د پاریس ښار پنځه بابره به لوی وي، له فضا څخه هم لیدل کېدای شي.
په دې برېښناکوټ کې به دومره برېښنا تولیدیږي چې د ټول سویس لپاره کفایت کوي.
دا پروژه د هند د لوېدیځ په شاړه او ښوره مځکه کې جوړېږي.
د دې پروژې اجرايي ريیس د اسیا د دوهم ستر شتمن ګوتام اډواني وراره ساګر اډواني دی.
د اډواني شتمني ۱۰۰ میلیارد ډالره ده. نوموړی هند ته د سکرو تر ټولو ستر واردوونکی او د ککړو سونګ موادو پانګوال دی خو وراره یې له ککړوونکو موادو د هند د پاکولو لپاره پاکې انرژۍ ته مخه کړې ده.
دی د کابو ۲۰ میلیارد ډالرو په لګښت په ګوجرات ایالت کې، چې د هند په لوېدیځ کې دی، د بادي او لمریزې انرژۍ د سترو برېښناکوټونو په جوړولو بوخت دی.
که دا پروژه په راتلونکو پنځو کلونو کې بشپړه شي، د نړۍ د تجدید کېدونکې انرژۍ تر ټولو ستره پروژه به وي او په هندوستان کې به ۱۶ میلیون وګړو ته برېښنا مهیا کړي.
د دې سترې پروژې موقعیت د نړۍ له یوې خطرناکې پولې، یعني د هند او پاکستان له پولې یوازې ۱۲ مایله لېرې دی.
د دې پروژې پراخوالی به ۲۰۰ مایل مربع وي او د اډواني د شرکت د مسوولانو په وینا د مځکې پر مخ به تر ټولو ستر برېښناکوټ وي.