د انسانیت لاره انسان ته په درناوي او له یوه او بل سره په مینه کې ده.

ځکه وايې:

زړونه مه ماتوه لعل د بدخشان دي
بیا مشکل دي روغول د شکستوو

او یا دا چې:

دل مه ازار که حج اکبر است
از هزاران کعبه یک دل بهتر است

د زړونو ماتول او ازارول د انسانیت لاره او کړنه نه ده، ځکه د هر چا له وس پوره ده. د زړونو لاس ته راوړل بیا د انسانیت لاره ده. اسلامیت او انسانیت د هغه چا کړنه ده، چې د وژلو، زورولو او د تیرې تورې پر ځای تدبیر غوره وګڼي.
په پښتو کې متل دی وايې:

له تورې تدبیر ښه دی.
خوشحال بابا وايې:

څو په تورو، په توبرو، په نیزو شي
صد چندان شي په تدبیر په هنرونو

ځکه په توره کې وژل، زورول او ویجاړول دي او په تدبیر کې مینه او درناوي وي.