تاند (چهارشنبه، د حوت ۲۳ مه) د ازبکستان د بهرنیو چارو وزیر بختیار سعیدوف له طالب چارواکو سره په کتنو کې وویل هیواد یې حاضر دی چې په افغانستان کې د سمینټو د تولید، د سکرو په استخراج او له سکرو څخه د برېښنا په تولید کې پانګونه وکړي.
سعیدوف په کابل کې د طالبانو له باندنیو چارو وزیر امیرخان متقي سره په کتنه کې د ترانزیت، ترانسپورت او سوداګرۍ په برخو کې د دوو هیوادونو د همکاریو پر زیاتېدو هم ټینګار وکړ.
د طالبانو د حکومت پر اساس، د ازبکستان د بهرنیو چارو وزیر طالب چارواکو ته ژمنه ورکړه چې هیواد یې حاضر دی چې په تاشکند کې طالب سفیر ومني.
د ريیس الوزرا د اقتصادی مرستیال د دفتر له خبرپاڼې سره سم د ازبکستان د بهرنیو چارو وزیر له ملاعبدالغني برادر سره په کتنه کې وویل: « هېواد یې چمتو دی له افغانستان سره د خپلو سیاسي او اقتصادي اړیکو پراخولو په موخه په نږدې راتلونکي کې په تاشکند کې د افغانستان اسلامي امارت سفیر ومني.»
په خبرپاڼه کې همداراز ویل شوي «ازبیکستان ته له آمو سیند څخه د افغانستان د استفادې دریځ ارزښت لري او هېواد یې چمتو دی د دغه کانال په تخنیکي برخه او همدا راز د اوبولګولو د عصري سیسټمونو په عملي کولو کې له اسلامي امارت سره همکاري وکړي.»
ملا برادر آخوند زیاته کړې چې، د افغانستان اسلامي امارت اقتصاد محوره بهرنی سیاست تعقیبوي چې اساسي تمرکز یې پر سیمهییز اتصال دی او دې موخې ته د رسېدو لپاره د سیمې او په ځانګړې توګه ازبیکستان همکارۍ ته اړتیا لري.
د ازبکستان د بهرنیو چارو وزیر په مشرۍ د دغه هیواد په ۳۰ کسیز پلاوي کې د کابینې یو شمېر نور غړي هم افغانستان ته راغلي دي.