تاند (چهارشنبه، د حوت ۲۳ مه) اروپایي ټولنې په افغانستان کې د بشري حقونو روان وضعیت د نه زغم وړ وباله او دا یې هم څرګنده کړه، چې دلته د طالبانو لخوا جنسیتي اپارتاید روان دی.
د دغې ټولنې د بهرني سیاست مسوول جوزف بورل، د ملګرو ملتونو د امنیت شورا په غونډه کې دا څرګندونې وکړې.
نوموړي له دې امله نیوکه وکړه، چې ګواکې افغانستان له نړیوالې ټولنې هېر شوی او د اندېښنې وړ وضعیت ته یې چندان پاملرنه نه کیږي.
په دې غونډه کې د اروپایي ټولنې استازي له طالبانو سره د اړیکو پراخیدو ملاتړ وکړ، خو ټینګار یې دا و چې د ملګرو ملتونو وروستی پرېکړه لیک چې د افغانستان په اړه و، هم باید عملي شي.
په دې پرېکړه لیک کې چې د افغانستان لپاره د ملګرو ملتونو د ځانګړي همغږي کوونکي فریدون سینیرلي اوغلو د موندنو او ارزونو له مخې، ترتیب شوی و، له افغانستان سره پکې د نړیوال تعامل د لارې نقشه روښانه شوې وه.
د امنیت شورا د تېرې شپې په غونډه کې د افغان ښځو په استازیتوب د ولسي جرګې پخوانۍ وکیلې فوزیه کوفي د خبرو پر مهال پر نړیوالې ټولنې نیوکه وکړه، چې پر طالبانو له فشارونو پرته دوی سره تعامل کوي او د رژیم د دوام لپاره یې د بشري مرستو په نوم مالي امکانات ورکوي.
طالبانو د امنیت شورا د دغې غونډې نیوکو او څرګندونو ته غبرګون نه دی ښودلی، خو ویاندویان یې تل په عمومي جملو کې د دوی پر وړاندې هر ډول نیوکې ردوي او خپل رژیم د ټولو افغانانو د حقونو تامینوونکی او استازی بولي.