تاند (جمعه، د حوت ۱۸ مه) الجزیره وايي، یو شمېر افغان ښځې نن د ښځو له نړیوالې ورځې سره په یو وخت د افغانستان په څو بیلابیلو ځایونو کې راټولې شوې او د طالبانو د سختدریځو اقداماتو په تېره بیا پر ښځو د بندیزونو د پای ته رسیدو غوښتنه یې وکړه.
الجزیره وايي دا اعتراضونه د تخار او بلخ په شمول په بیلابیلو ولایتونو کې شوي دي.
طالبان مظاهرو او اعتراضیه غونډو ته اجازه نه ورکوي.
الجزیره وايي، په تخار کې په یوه غونډه کې، ۷ ښځې راټولې شوې وې او دا شعار یې ورکاوه:«حقونه، عدالت، ازادي»
یوې ښځې، چې مخ یې پوښلی و، په یوه ویډیو کې ویلي:«زموږ چوپتیا او بېره د طالبانو تر ټولو غټه وسله ده.»
الجزیره وايي چې په بلخ کې هم یو شمېر ښځو په خپله مظاهره کې وویل: «طالبانو ته فرصت مه ورکوئ، د افغانستان ښځې وژغورئ.»
په مزارشریف کې شاوخوا ۲۰ ښځې رایوځای شوې وې څو خپل اعتراض څرګند کړي.
په افغانستان کې له شپږم ټولګي پورته د نجونو د ښوونځیو د بندېدو کابو دوه نیم کاله وځي.
طالبانو د ۲۰۲۲ په دسمبر کې د نجونو پر مخ پوهنتونونه هم بند کړل.
په کورنیو او بهرنیو موسسو او د ملګروملتو په دفترونو کې د ښځو پر کار بندیز، پارکونو، حمامونو او تفریحي ځایونو ته د ښځو پر تګ بندیز او د سینګارتونونو ممنوعیت په افغانستان کې د ښځو خلاف د طالبانو نور افراطي اقدامات ګڼل کېږي.
طالبان وايي چې د اسلامي شریعت په چوکاټ کې د ښځو حقونو ته ژمن دي.
که غونډو ته اجازه نه ورکوي او همدارنګه لاريونونه او اعتراضونه (نيوکې) زغملی نه شي، نو بيا د زده کړو ته اجازه او مېرمنو ته د کار حق ورکړي. تر څو به خلک نور چوپ ساتي؟