تاند(چهارشنبه، د حوت ۱۶ مه) لرغونپوهانو د امریکا د لویې وچې په پاناما کې د کیندنو په ترڅ کې یوه لرغونې مقبر وموندله چې د سرو زرو خزانه او د قرباني شویو کسانو د هډوکو پاته شونې پکې پراته دي.
سي بي سي شبکې د پاناما د کلتور وزارت پر اساس وویل چې ګومان کېږي دا مقبره شاوخوا ۱۲۰۰ کاله پخوانۍ وي او غالباً د یوه اشرافي قبر دی چې لسګونه کسان نور ورسره خاورو ته سپارل شوي دي.
د دې سیمې د پخوانیو دودونو پر اساس به کله چې کوم اشرافي مړ شو، لسګونه کسان به د دې لپاره ورسره خښېدل چې بلې دنیا ته یې بدرګه کړي او یوازې یې پرېنږدي.
لروغونپوهانو په دې مقبره کې، چې د پاناما په ال کانو پارک کې ده، د سرو زرو د څو کرو، دوو کمربندونو، والیو، طلايي مجسمو او نورو طلايي وسایلو په شمول لویه خزانه موندلې ده.
لرغونپوهان وايي، داسي ښکاري چې په دې مقبره کې خښ شوی اشرافي به د مرګ په مهال شاوخوا ۳۰ کلن و. له ده سره د ۳۱ نورو کسانو پاته شونې موندل شوي خو کیندنې لا دوام لري او ښايي د خښ شویو کسانو شمېر تر دې ډېر وي.