تاند ( ۲ شنبه، د حوت ۱۳ مه) په افغانستان کې د وروستیو ورښتونو په دوام، له سرپل ولایت څخه راپورونه وایي چې پنځه تنه د سړې هوا او د کوټې د چت لوېدو له امله مړه شوي دي.
د سرپل لپاره د طالبانو د رژیم د والي ویاند حبیبالله مسرور ویلي چې د دغه ولایت په البدر ولسوالۍ کې دوه ښځې او دوه ماشومان د سړې هوا او روغتیايي مرکز ته په وخت د نهرسېدو له امله مړه شوي او یو تن بل د کوهستانات ولسوالۍ په ده سرخ کلي کې هغه مهال مړ شوی چې د کوټې چت راولوېد.
د ښاغلي مسرور د څرګندونو پر بنسټ، په سانچارک لسوالۍ کې هم د دوو نورو کورونو چتونه هم لوېدلي دي.
تر دې مخکې په کونړ او هلمند ولایتونو کې هم د چتونو د لوېدو له امله د یو شمېر کسانو د مړینې خبر ورکړل شوی و.
د طبیعي پېښو په چارو کې د طالبانو وزارت پرون د وروستیو ورښتونو د اړوندو پېښوله امله د ۳۹ تنو د مړینې خبر ورکړ.
وېره ده چې د مرګ ژوبلو شمېر تر دې زیات وي ځکه چې د ګڼو سیمو لارې بندې دي او ډېر خلک د مرګ ژوبلو په اړه کره معلومات نه شریکوي.
د هوا پېژندنې ادارې د نورو ورښتونو وړاندوینه هم کړې ده.
د ټولګټو وزارت پرون وویل چې د سالنګ په ګډون د یو شمېر ولایتونو لارې د واورو د اورېدو له کبله بندې دي.
دغه وزارت پر خپله ایکسپاڼه لیکلي چې لا هم په سالنګونو کې واوره اوري خو هڅه روانه ده چې بندې شوې لارې بېرته پرانیستل شي.
د طالبانو د حکومت د ټولګټو وزارت ویندوی محمداشرف حق شناس پر خپله ایکسپاڼه کښلي چې د سالنګ لار له تېرو ۴ ورځو راهیسي د درنې واورې د اورېدو، توپان او د لیدل کېدونکې ساحې د محدودیت له کبله بنده.
ده همداراز ویلي چې په یاده موده کې ۴۵۲ کورونه نړېدلي او لږترلږه ۵ زره ۲۵۳ څاروي مړه شوي دي.
په همدې حال کې د ټولګټو وزارت وايي چې په شمالي سالنګ کې د واورې اندازه یو نیم متر خو د تونل په برخه کې ۳ مترو ته رسیږي.
تراوسه پورې په سالنګونو کې ۲۵ ځلې واوره ښوییدلې ده.