تاند (یکشنبه، د حوت ۱۲ مه) د طالبانو د کورنیو چارو وزارت منسوبینو، د کابل ښار د څلورمې امنیتي حوزې په مربوطاتو کې د یوه ماشوم د ژغورلو او په دې لړ کې د عملیاتو پر مهال د ۲ تورنو تښتونکو د وژل کېدو خبر ورکړی.
د طالبانو کورنیو چارو وزارت په یوه اعلامه کې ویلي، عبدالفهیم نومی ماشوم، چې څوارلس ورځې وړاندې د يوولسمې حوزې له مربوطاتو تښتول شوی و، د خلاصون په بدل کې یې له کورنۍ څخه د اته سوه زره امریکایي ډالرو غوښتنه شوې وه.
سرچینه زیاتوي، چې د دوی ځواکونو نن دغه ماشوم د تښتوونکو له منګولو ژغورلی دی.
د اعلامیې له مخې، د یادو عملیاتو پر مهال نښته رامنځته شوې، چې په پایله کې یې دوه تنه انسان تښتوونکي وژل شوي دي.
طالبانو د تورنو انسان تښتونکو د هویت او نورو جزییاتو په تړاو څه نه دي ویلي.
په وروستیو کې له بېلابېلو ولایتونو څخه د ماشومانو د تښتونې ورته راپورونه ورکول کیږي، خو طالبان یې د بېرته خلاصون خبر ورکوي.
که رشتا هم وژل سوی کسان همهغه تښتوونکی وی نو د شکران او خوښی او منلو او حتی ستائنی وړ خبره ده.