پنجشنبه, اپریل 18, 2024
Homeخبرونهد ملګرو ملتونو امنیت شورا روانه اوونۍ بیا د افغانستان په اړه...

د ملګرو ملتونو امنیت شورا روانه اوونۍ بیا د افغانستان په اړه غونډه لري

تاند (یکشنبه، د حوت ۱۲ مه) خبري سرچینو ویلي، چې ټاکل شوې روانه اوونۍ بیا د ملګرو ملتونو امنیت شورا د افغانستان په اړه غونډه ولري.

ویل شوي، چې دې غونډې ته په افغانستان کې د ملګرو ملتونو د مرستندوی دفتر( یوناما) مشره مېرمن رزا اوتنبایوا هم بلل شوې ده.

تمه ده، چې رزا اوتنبایوا به د امنیت شورا غونډې ته د افغانستان د وروستیو درېیو میاشتو د وضعیت په اړه خپل راپور وړاندې کړي.

د دغې غونډې د نورې ممکنې اجنډا په تړاو جزییات نه دي ورکړل شوي.

امنیت شورا ته دمګړۍ د افغانستان لپاره د ملګرو ملتونو د بل ځانګړي استازي د ټاکلو ناندریزه موضوع او پر دغې موضوع د پایلې ته نه رسېدو له امله د افغانستان لپاره د ملګرو ملتونو د سرمنشي د ځانګړي همغږي کوونکي فریدون سینیرلي اوغلو د پای ته رسېدلي ماموریت احتمالي تمدید، یا نه تمدید هم په مخکې پرتو اجنډاوو څخه اټکلیږي.

اټکل دا دی، چې د امنیت شورا دغه پلان شوې غونډه به د راتلونکې چارشنبې په ورځ وي.

امنیت شورا تېره پنجشنبه هم د افغانستان په اړه د دوحې د دویمې ناستې له بې پایلې پای ته رسېدو وروسته، یوه ځانګړې غونډه لرله، چې ظاهراً بې پایلې پای ته ورسېده.

د بندو دروازو تر شا د هغې ترسره شوې غونډې اصلي بحث هم دا و، چې د افغانستان لپاره د ملګرو ملتونو ځانګړی استازی وټاکل شي کنه؟

د امنیت شورا په توافق د تصویب شوي دغه استازي ټاکنه د دې لپاره پلان شوې وه، چې له نړیوالې ټولنې سره د افغانستان د بېرته یو ځای کېدو بهیر سمبال او د کار د یوې برخې په توګه په افغانستان کې د سولې بین الافغاني مذاکرات تنظیم کړي.

په کابل کې د طالبانو واکمن رژیم د یوناما دفتر په موجودیت کې د دغه استازي ټاکنه رد کړې او د امنیت شورا دوو دایمي غړو روسیې او چین هم د دوی په غوښتنه د دغه استازي د ګومارلو مخنیوی کړی.

له دې سره، د ملګرو ملتونو د سرمنشي ویاند تېره اوونۍ ټینګار وکړ، چې یاد شوی استازی به  هرومرو ټاکل کیږي او دا چاره تر کار لاندې ده.

LEAVE A REPLY

Please enter your comment!
Please enter your name here

- Advertisment -

ادب