تاند (شنبه، د حوت۵ مه) د طالبانو د رژیم ویاند ذبیح الله مجاهد، په افغانستان کې د اساسي قانون د نشتوالي نیوکو ته په غبرګون کې ادعا کړې، چې د دغه قانون نشتوالی، قانوني تشه نه ده.
د هغه په وینا، اساسي قانون لرل مهم دي، خو دوی یې په نشتوالي کې له اسلامي شریعت څخه د قانون په توګه استفاده کوي.
مخکې طالب ویاند ویلي وو، چې دوی د اساسي قانون د جوړولو چارې ګړندۍ کړي او ژر به دغه قانون بشپړ شي، خو په تازه څرګندونو کې یې په دې تړاو څه نه دي ویلي.
د طالبانو منقدان د دوی رژیم، د نړۍ یوازینی بې قانونه حاکمیت بولي او په خپلسریو او سلیقوي چلندونو یې تورنوي؛ هغه ادعا چې طالب چارواکي یې بې اساسه ګڼي او برعکس د عدالت او ټولو خلکو د حقونو د خوندیتوب ادعا کوي.
د ذبیح مجاهد خبرې چې سره څنګ پر څنګ کېږدې، تفاوت ته به يې حیران شې. په دروغو شرم پکار دی.
کوم شریعت؟
هغه شریعت چې واقعي اسلامي دی ؟
که د سعودي شریعت ؟
یا د ایران امام خمیني شریعت ؟
او که د تور پنجاب شریعت ؟
آیا په شریعت کې دا جواز لري چې د یوه هېواد مشر د په سوړه ننوتی وي . خپل مخ د له مسلمانانو پټ او شاه ورواړوي او یا د ملا خډل نډیم په شان خلکو ته ښکنځل وکړي؟
په شریعت کې خو کار اهل کار ته سپارل الهي امر دی ، آیا تاسو هغه عملي کړی ؟
آیا تاسې د افغانستان په هره برخه کې له کونډو ، یتیمانو ، خوارانو ، غریبانو احوال اخیستی او د تاسو لوکس کورونه ، لباس ، خوراک او امتیازات شرعي دي ؟ او نور….