تاند ( دوشنبه، د دلوې ۲۳مه) د طالبانو د کډوالو او بېرته راستنیدونکو چارو وزارت مرستیال ویلي، چې په ترکیه کې څه باندنې ۱۶ سوه افغان کډوال بندیان دي.
د دغه وزارت مرستیال، عبدالرحمن راشد وايي چې د دغو بندیانو د خوشې کولو لپاره هڅې روانې دي.
د هغه په وینا، د روان لمریز کال له پیله تر دې دمه د ترکیې له بندخونو نږدې ۶۰۰ تنه بندیان خوشې شوي او بېرته هېواد ته راستانه شوي دي.
له دې سره، ترکیه کې مېشت یو شمېر افغانان وایي چې هغلته د بندي افغانانو شمېر تر ښودل شوې شمېرې څو چنده زیات دي.
طالب چارواکي بیا وایي، چې دوی ته اړوندو ادارو د بندیانو شمېر همدومره ښودلی.
د کډوالو او راستنېدونکو چارو وزارت د شمېرو له مخې، په ترکیه کې دا مهال شاوخوا درې سوه زر افغانان اوسېږي.
دغه افغانان تر ډېره د جمهوري نظام له پرځېدو وروسته له افغانستانه وتلي، چې یوه لویه برخه یې د پرځیدلي نظام منسوبین دي.
یو زیات شمېر نور افغانان د اقتصادي ستونزو، د طالبانو د غچ اخیستونکو بریدونو او نورو دلایلو له امله د ایران له لارې په ناقانونه توګه ترکیې ته د تلو او هغلته زیاتو ستونزو سره د مخ کیدو خبر ورکوي.