دوشنبه, فبروري 26, 2024
Homeخبرونهپه داعش کې د افغانانو د حضور او کارولو په اړه د...

په داعش کې د افغانانو د حضور او کارولو په اړه د ملګرو ملتونو د سرمنشي راپور

تاند ( دوشنبه، د دلوې ۲۳مه) د ملګرو ملتونو سرمنشي انتونیو ګوترش د اسلامي دولت ډلې یا داعش د خراسان څانګې په لیکو کې د افغانانو د حضور او کارول کېدو په اړه خپل هغه راپور خپور کړی چې د ملګرو ملتونو د امنیت شورا ته لیکل شوی.

په دې راپور کې ویل شوي چې د داعش په لیکو کې د افغانانو استخدام د پام وړ و.

د راپور له مخې، د یادې څانګې په اکثره عملیاتو کې له دغو افغانانو کار اخیستل شوی دی.

په دې راپور کې ویل شوي چې په افغانستان او عراق کې د اسلامي دولت ډلې یا داعش او د دې ډلې د خراسان څانګې له خوا د بریدونو کمښت احتمالاً د طالبانو لخوا د تروریزم ضد هڅو او هم د دې ډلې د مشر په ستراتېژۍ کې د بدلون زیږنده وي.

په راپور کې غړیو هېوادونو په افغانستان، منځني ختیځ او افریقا کې د وسلو د پراختیا په اړه هم اندېښنه څرګنده کړې او یو شمېر غړیو هېوادونو ویلي چې پر افغانستان د طالبانو له بیا واکمنیدو راهیسې د وسلو له زېرمو وسلې انتقالیږي.

دوی همدارنګه ویلي چې د اسلامي دولت ډلې یا داعش د خراسان څانګې د تحریک طالبان پاکستان یا ټي ټي پي څخه دا ډول وسلې ترلاسه کړي یا یې هم د ترلاسه کولو هڅه کړې ده.

په کابل کې د طالبانو واکمن رژیم تراوسه د دغه راپور په اړه غبرګون نه دی ښودلی، خو تر دې مخکې یې په افغانستان کې د داعش ډلې د پياوړتیا او له دغه هېواده نورو سیمو ته د وسلو د لېږد او پلور ادعاوې بې اساسه ګڼلي دي.

دا راپور داسې مهال خپور شوی، چې راتلونکې اوونۍ په دوحه کې د افغانستان په اړه د ملګرو ملتونو د سرمنشي په کوربه توب یوه مهمه غونډه ترسره کیږي.

دې غونډې ته د طالبانو د رژیم استازي هم بلل شوي او ګومان کیږي، چې د دغه راپور خپریدل به پر طالب رژیم د فشارونو یوه برخه وي.

LEAVE A REPLY

Please enter your comment!
Please enter your name here

- Advertisment -

ادب