تاند ( یکشنبه، د دلوې ۱۵ مه) د بدخشان لپاره د طالبانو د رژیم ځایي چارواکو ویلي، چې په دې ولایت کې د واورو له امله له یوې جنازې څخه ستنیدونکي ۳ ځوانان مړه شوي.
د بدخشان لپاره د طالبانو د امنیې قوماندانۍ ویاند احسان الله کامګار ویلي، چې دا پېښه نن یکشنبه د شهر بزرګ ولسوالۍ په سنگخواه کلي کې شوې.
سرچینه زیاتوي، چې د مړو شویو ځوانانو جسدونه د سیمې د خلکو په مرسته له واورو ویستل شوي.
له څو ورځو راهیسې د افغانستان په پلازمېنه کابل، بدخشان او یو شمېر نورو ډېرو سړو سیمو کې واورې او بارانونه وریږي.
کروندګر خوښ دي چې ورښتونه به د وچکالۍ د کمولو لپاره ګټور پرېوځي، خو بېوزله او له ګاونډیو هېوادونو ستانه شوي کډوال بیا شکایت کوي چې ستونزې یې زیاتې شوي او څوک مرسته نه ورسره کوي.