تاند(سې شنبه، د دلوې ۱۰ مه) د پاکستان پوځ د معمول خلاف د بلوچستان د ازادۍ پوځ له لوري بریدونه تایید کړل خو ادعا یې وکړه چې پر مچ او کولپور کې د پوځ پر مرکزونو یې بریدونه ناکام کړي دي.
د پاکستان د پوځ مطبوعاتي څانګې په یوه خبرپاڼه کې ویلي چې نن شپه «د انتحاریانو په شمول څو تروریستانو» د مچ او کولپور پر کمپلیکسونو حملې وکړې چې د قانون نافذوونکو ځواکونو له لوري اغېزمن ځواب ورکړل شو.
د پاکستان پوځ همداراز وايي، امنیتي ځواکونه له بریده وروسته سمدستي چمتو شول او عملیاتو ته تیاري نیسي.
د پاکستان د پوځ په وینا تراوسه د ۳ انتحاریانو په شمول ۹ بلوچ حمله کوونکي وژل شوي او۳ نور ټپیان دي.
د پاکستان پوځ په دې نښته کې د خپلو ۴ تنو وژل کېدا تایید کړې ده.
خو دا په داسې حال کې ده چې د بلوچستان د ازادۍ پوځ وايي چې مچ ښار او دغه ښار ته ټولې تلونکې لارې یې په بشپړ کنټرول کې دي.