تاند (پنجشنبه، د دلوې ۵ مه) نامعلومو وسله والو پرون (چهارشنبې) ماښام په بلوچستان ایالت کې د ایران پولې ته نژدې د تربت په هوشاپ سیمې کې پنځه پنجابیان وتښتول.
راپورونه وايي چې تښتول شویو کسانو د دولتي مخابراتي شرکت یوفون د نوي برح یا ټاور د نصبولو لپاره کار کاوه.
ځایي چارواکو پېښه تایید کړې او ویلي چې دا کسان د بلوچستان د تربت ولسوالۍ د شاوخوا په ۷ کیلومترۍ کې د کیچ په سيمه کې شوې ده.
دغه کسان له امنیته ځواکونو پرته په کرولا موټر کې سیمې ته د کار لپاره روان وو.د تښتول شویو کسانو نومونه نذیر احمد، محمد طارق، صفدر علي، فاروق او حسنین ښودل شوي دي.
د تربت د سیمې مرستیال کمیشنر په امر د ملېشه ځواک ټیمونه سیمی ته استول شوي دي خو تر اوسه د تښتول
شویو کسانو په اړه معلومات نه دي ترلاسه شوي.
دوې میاشتې واړندې د بلوچستان په تربت ولسوالۍ کې ۷ پنجابي کارګر یا مزدوران د وسله والو له خوا وژل شوي وو.
تراوسه پورې نه د دې تازه او نه د پخوانۍ تښتونې مسوولیت کومې ډلې په غاړه نه دی اخیستی.
په بلوچسنان کې له یوې خوا بلوچ بېلتون غوښتونکي او له بلې خوا د ټي ټي پي په شان ډلې فعالیت کوي.