تاند (سې شنبې د دلوې ۳ مه) د طالبانو د حکومت اقتصادي کمیسیون نن (سې شنبې) د حق العبور یا ټول پلازا په بدل کې د کابل جلال اباد د دوهم سړک د جوړېدا پروژه تصویب کړه.
اقتصادي کمیسیون د رييس الوزرا د اقتصادي مرستیال ملاعبدالغني برادر په مشرۍ په غونډه کې د ټولګڼو وزارت ته لارښوونه وکړه چې د کابل – جلال اباد د دوهم سړک پروژه داوطلبۍ ته وړاندې کړي.
دې کمیسیون په عین حال کې له ټولګټو وزارت څخه وغوښتل چې باید دا سړک په معیاري ډول جوړ شي.
کمیسیون همداراز د کابل ولایت په ختیځه سیمه کې د لارو د محصول ټولولو لپاره د دروازو جوړول تصویب کړل.
د طالبانود حکومت د خبرپاڼې پر اساس، خصوصي سیکتور به د عامه – خصوصي مشارکت له لارې د لسو کلونو لپاره پر سړک پانګونه وکړي.
د دې طرحې پر اساس به په لومړیو ۲ کلونو کې به ۵۱ سلنه عاید د دولت خزانې ته ورکول کېږي، او له درېیم کال څخه تر لسم پورې به ۹۰ سلنه عاید د دولت په خزانه کې ټولیږي.