تاند (یکشنبه، د دلوې ۱ مه) د پاکستان د موقت حکومت د اطلاعاتو وزیر مرتضی سولنګي وایي، چې که په افغانستان کې د طالبانو رژیم دوی سره ښې اړیکې غواړي، د ټي ټي پي یانې پاکستاني طالبانو تحریک په ګډون دې د « ترهګرو ډلو» خلاف اقدام وکړي.

نوموړي په یوه تازه مرکه کې دا څرګندونې داسې مهال کړي چې پرون د طالبانو د رژیم ویاند ذبیح الله مجاهد وویل: پاکستان ته زموږ او د افغانانو د ښو اړیکو نیت څرګند شوی.

مجاهد نن د پاکستاني وزیر په غبرګون کې وویل:«په ټوله کې د پاکستان په ګډون له ګاونډیو هېوادونو سره د اسلامي امارت اړیکې ښې دي، خو لا هم ځیني ستونزې شته دي، چې باید حل شي، ترڅو راتلونکې کې ستونزې جوړې نه کړي.»

د پاکستان د جمیعت علمای اسلام ګوند مشر ملا فضل الرحمان بیا ویلي، چې په افغانستان کې د طالبانو واکمن رژیم د افغانستان د تاریخ په کچه « د پاکستان تر ټولو ملګری» حاکمیت دی.

دا په داسې حال کې ده چې د طالبانو او پاکستان اړیکې په پرله پسې ډول له ناندریو ډکې ښکاري او دواړه یو پر بل د دغو اړیکو د خړولو تورونه پورې کوي.

پاکستان د طالبانو له بیا واکمنیدو سره له دغه هېواده څه باندې نیم میلیون افغان کډوال په زوره وایستل او اوس یې هم له افغانستان سره په دې نوم، چې ګواکې دغه هېواد ته د افغان سوداګریزو توکیو د لېږدونکو لاریو چلوونکي د پاکستان ویزې نه لري، له افغانستان سره ټولې تجارتي لارې تړلې دي.