تاند (یکشنبه، د دلوې ۱ مه) د د ایران د قضاییه قوې مرستیال کاظم غریب ابادي، چې کابل ته راغلی دی، پرون (شنبې) د طالبانو د حکومت د بهرنیو چارو له سرپرست وزیر امیرخان متقي سره ولیدل.
د ایران د ایسنا خبري اژانس د راپور له مخې، غریب ابادي د یوه پلاوي په مشرۍ او د افغانستان د سترې محکمې په بلنه افغانستان ته تللی دی.
ده له امیرخان متقي سره په کتنه کې له تروریزم او تکفیري ډلو لکه داعش سره د مبارزې او په دې برخه کې د ګډې قضايي کمېټې د جوړېدو، افغانستان ته د ایران د تجربو د انتقال، د محکومانو د انتقال او د مجرمانو د تبادلې په اړه خبرې وکړې.
له ښاغلي متقي سره د ښاغلي غریب ابادي په کتنه کې د افغانستان لپاره د ایران د ولسمشر ځانګړي استازي او سفیر حسن کاظمي قمي هم حاضر و.
کابل ته د ایران په راغلي پلاوي کې د دغه هیواد د قضاییه قوې د اطلاعاتو، ټکنالوژۍ او احصایې د مرکز ريیس محمد کاظمي فرد او د تهران ولایت د عدلیې قضايي مرستیال یونس طرهاني هم ملګري دي.
افغانستان او ایران دواړه د داعش په اړه اندېښنه لري او دا ډله په دواړو هیوادونو کې بریدونه کوي.
د ایران په کرمان کې د وروستي برید مسوولیت داعش په غاړه واخیست او ادعا وشوه چې حمله کوونکي له افغانستان څخه ایران ته تللي وو.
ایران: عادل پنجشېری په تهران کې دی او د نیولو په هڅه کې یې یوو