تاند (شنبه، د جدي ۳۰ مه)د ایران د استخباراتو وزارت له ایرانیانو غوښتي چې د داعش وسله والې ډلې د خراسان څانګې د یو غړي محمد عادل چې د دې وزارت د معلوماتو پر بنسټ د تهران په لویدیځ کې لیدل شوی په نیولو کې مرسته وکړي.
عادل پنجشېری د تېر جمهوري حکومت پر مهال د افغانستان ملي امنیت په کابل پوهنتون د برید په تور ونیوه او د افغانستان سترې محکمې د ۲۰۲۰ کال په ډیسمبر میاشت کې په اشد مجازاتو یانې اعدام محکوم کړ.
ایراني چارواکو ویلي، چې هغه د کرمان د وروستیو خونړیو چاودنو اصلي عامل هم دی.
په افغانستان کې د طالبانو واکمن رژیم په دې اړه څه نه دي ویلي.
ویل شوي، چې پنجشېری د جمهوري نظام پر مهال په بګرام زندان کې بندي و، خو د جمهوریت له پرځېدو سره له دغه زندانه تښتېدلی او اوس یې په ایران کې د یادو بریدونو تنظیمات کړي.
ایران مخکې یو تاجسکتانی وګړی هم د کرمان د چاودنو له عاملانو ګڼلی و.