تاند (چارشنبه، د جدي ۲۷ مه) د پاکستان ډاون ورځپاڼې د خپلو سرچینو له قوله ادعا کړې، چې په افغانستان کې د طالبانو واکمن رژیم له پاکستان سره د ټولو تجارتي لارو د بندولو خبرداری ورکړی.
ورځپاڼه زیاتوي، چې دا خبرداری له پاکستاني لوري سره د تورخم دروازې د پرانیستلو په اړه د طالب چارواکو د مذاکراتو له ناکامیدو وروسته ورکړل شوی.
د ورځپاڼې له قوله، طالب چارواکو په دغه خبرداري کې ویلي چې د تل لپاره به تورخم او خرلاچي لارې د سوداګرۍ پر مخ وتړي.
ډاون ورځپاڼې د دغه ادعا شوي خبرداري په تړاو نور جزیات نه دي ورکړي.
تورخم دروازه نیږدې یوه اوونۍ کېږي، چې د پاکستان لخوا ظاهراً په دې دلیل چې دغه هېواد ته د بار وړونکو موټرو افغان چلوونکو د پاکستان ویزې او پاسپورټونه نه لرل، دا لاره د افغان بار وړونکو موټرو پر مخ تړلې ده.
د پاکستان لخوا بیا- بیا د تورخم او نورو تجارتي لارو تړل کېدو افغان سوداګر ډېر زیانمن کړي او پر پاکستان یې د توندو نیوکو سبب شوي.