تاند (چارشنبه، د جدي ۲۷ مه) د بدخشان لپاره د طالبانو والي محمد ایوب خالد ادعا کړې، چې راتلونکې اوونۍ به د یوه سړک له بشپړولو سره افغانستان او چین ونښلوي.
نوموړي ویلي، چې د دغه سړک د جوړېدو چارې د جمهوري نظام پر مهال په ټپه درېدلې وې او اوس به یې ژر چارې بشپړې شي.
خالد زياته کړې، چې د ورېښم لارې په نوم د دغه سړک د جوړولو چارې شاوخوا پنځه مياشتې وړاندې پيل شوې وې.
څلور میاشتې وړاندې د طالبانو د کلیو د پراختیا او بیارغونې وزارت اعلان وکړ چې د نږدې ۵۰ کیلومتره سړک د جوړولو کار د بدخشان ولایت د واخان ولسوالۍ د کوچني پامیر له ګنبد څخه د چین تر پولې پورې د ۳۶۹ میلیونو افغانیو په لګښت پیل شوی دی.
څو ورځې مخکې د طالبانو د رئیس الوزرا اقتصادي مرستیال ملا برادر اخوند هم د دغه سړک د ژر جوړېدو یادونه کړې وه.
یو شمېر شنونکي بیا باور لري، چې د سړک نښلول به د افغانستان او چین پر اړیکو او سوداګرۍ ډېر اغېز ځکه ونه لري، چې چین هم د نورې نړۍ په شان د طالبانو رژیم په رسمیت نه پېژني او د داسې اړیکو په موجودیت کې به افغانستان له ورته اتصالي سړکونو ډېر خیر ونه ویني.