تاند (سې شنبه، د جدې ۱۹ مه) د افغانستان د ریللارې ادارې ريیس په کابل کې د ترکمنستان له سفیر سره په کتنه کې وویل چې کابل حاضر دی د هرات – تورغونډۍ په لاره کې د رېل پټلۍ د جوړېدو لپاره مځکې استملاک کړي.
د ریللارې ادارې ريیس بخت الرحمان شرافت په افغانستان کې د ترکمنستان له سفیر خواجه عوض اوف سره په کتنه کې له تورغونډۍ څخه تر هرات ښاره د ریللارې د جوړېدو او د دې هدف لپاره د مځکو د استملاک په اړه خبرې وکړې.
د افغانستان د ریللارې ادارې له خبرپاڼې سره سم، ښاغلي شرافت له ترکمنستان څخه د ریللارې په پروژو کې د ګډ کار د وړاندیز ترڅنګ وویل چې افغانستان به د تورغونډۍ – هرات ترمنځ د پټلۍ د تېرېدو لپاره مځکې له خلکو په بیه واخلي.
د دې هدف لپاره هرات ته یو پلاوی واستول شو چې مځکې مشخصې کړي.
ترکمنستان پر تورغونډې سربېره خپله ریلار د اقینې بندر ته غځولې او له بلې خوا ازبکستان ډېر لېوال دی چې د حیرتان – مزارشریف ریللار تر پاکستانه پورې ورسول شي.
د دې پروژې، په اړه د افغانستان، ازبکستان او پاکستان حکومتونو د ۲۰۲۱ په فبرورۍ کې موافقه کړې وه او د طالبانو له واک ته رسیدو وروسته پرې بیا درو خواوو خبرې وکړې خو تراوسه پورې پانګوونکي نه دي حاضر شوي چې دا پروژه تمویل کړي.