تاند (دوشنبې، د جدې ۱۸ مه) د ایران د بهرنیو اتباعو او کډوالو د ادارې عمومي ريیس د یکشنبې په ورځ وویل چې د کرمان په دوو چاودونو کې ۱۴ افغانان وژل شوي او یو شمېر نور ژوبل شوي دي.
مخکې ایراني چارواکو ویلي وو چې د چهارشنبې په ورځ (د جدې ۱۳ مه) په کرمان کې د قاسم سلیماني د تلین په مراسمو کې د دوو چاودنو په نتیجه کې ۱۲ افغانان وژل شوي دي.
د ایرنا خبري اژانس د راپور له مخې، د کرمان د بهرنیو اتباعو او کډوالو د ادارې ريیس محمد جلالي فرد وویل:«د کرمان د شهیدانو ګلزار په ترهګره پېښه کې تراوسه ۱۴ افغانان شهیدان شوي او ۱۹ نور ژوبل شوي دي.»
د ده په وینا د ۶ ټپیانو حال ښه نه وو او تراوسه په روغتون کې دي خو نور له لومړنۍ درملنې وروسته کورونو ته لېږل شوي دي.
د چهارشنبې په ورځ په کرمان کې د سپاه پاسداران د قدس ځواک د قوماندان قاسم سلیماني د څلورم تلین په مراسمو کې د دوو چاودنو په نتیجه کې نژدې سل تنه ووژل شول او شاوخوا ۲۸۰ نور ژوبل شول.
د ډیرو د باور خلاف په دې چاودنو کې اکثره وژل شوي افغانان پښتانه وو. هغوی د غونډې دځای په شاوخوا کې اوسیدل او د وړیا وېشل کېدونکې ډوډۍ لپاره د پېښې ځای ته تللي وو.
داعش ډلې د دې برید مسوولیت په غاړه واخیست.
په پیل کې د کرمان د بهرنیو اتیاعو او کډوالو عمومي ادارې د دغو وژل شویو افغانانو نومونه اعلان کړي وو:
- رضا نورزی
- محمد قاسم احمدي
- مریم تاجیک
- محمد متین احمدي
- محمدتاجیک
- نازنین فاطمه عزیزي
- زهرا فیضي
- نظیفه غفوري
- نعمت الله اڅکزی
- لطیفه اڅکزۍ
- معصومه اڅکزی
- راز گل علیزی
دا بی عقل جاهل افغانان د یو لندغر د مرگ په تلین که سه مرگ غوشتل؟ دوی ایران ته مهاجرت او بی روزگاری نه تللی وو، او که سیاسی ایرانی مارشونو که گدون کول دپاره؟
وروره د خبر په متن کې په واضحه توګه لیکل شوي دي چې هغوی د غونډې دځای په شاوخوا کې اوسیدل او د وړیا وېشل کېدونکې ډوډۍ لپاره د پېښې ځای ته تللي وو.