تاند (یکشنبه، د جدې ۱۷ مه) د طالبانو د حکومت ویندوی ذبیح الله مجاهد وايي، په روان میلادي کال کې هیله شته چې د افغانستان اوسنی حکومت د نړیوالې ټولنې له لوري په رسمیت وپېژندل شي.
ده زیاته کړه، امارت هڅه کوي چې له هیوادونو سره د تعامل په لاره کې خنډونه لېرې کړي.
ښاغلي مجاهد په عین حال کې وویل:«دا یو طرفه سړک نه دی او نه شي کېدای چې له یوه لوري ورته وکتل شي، ځینې سازمانونه او هیوادونه خنډ پېښوي، هغوی هم باید انعطاف وښيي.»
د طالبانو ویندوی په داسې حال کې هیله ښيي چې د نړۍ نور هیوادونه به د دوی د حکومت په رسمیت پېژندلو کې خپل دریځونه نرم کړي چې د طالبانو حکومت هر څه موده وروسته داسې اقدامات کوي چې د نړیوالې ټولنې د پارونې سبب کېږي.
طالبانو نه یوازې نجونې او ښځې له زده کړو او کاره منع کړي، بلکې د ښځو د ټولنیزو فعالیتونو د محدودولو لپاره یې لسګونه فرمانونه صادر کړي. په درسته نړۍ کې افغان ښځې د ټولې کُرې تر ټولو مظلومې ښځې ښکاري او له همدې کبله د سویس په شان یو شمېر هیوادونو اعلان کړی چې افغان ښځو ته بې پوښتنې پناه ورکوي.
خو که تاسې د جاهل زامن د انسان او انسانیت حق وپيژنۍ !