تاند (پنحشنبه، د جدي ۱۴ مه) په داسې حال کې چې لا هم د افغانستان له بېلابېلو سیمو د ماین چاودنو د تلفاتو خبرونه ورکول کیږي، د ملګرو ملتونو د معاونیت دفتر (یوناما) ویلي چې په دغه هېواد کې ۷۰ سلنه سیمې د چاودېدونکو توکو له شتون څخه پاکې شوې دي.
دغه دفتر زیاته کړې چې افغانستان هغه هېواد دی چې په کې د نړۍ په کچه د ماین پاکۍ لومړنی بشري پروګرام پیل شوی دی.
دغه بنسټ همدا راز زیاته کړه چې د دغو فعالیتونو له پیل راهیسې د افغانستان د ماین پاکۍ پروګرام نږدې ۱۴ میلیونه چاودېدونکي توکي له منځه وړي دي.
په افغانستان کې د بېوزلۍ او فقر له شدت سره، د ماین چاودنو پېښې هم تړل شوي ګڼل کیږي.
په هغو خبرونو کې چې د ماین چاودنو په اړوند خپریږي، ویل کیږي چې قرباني شوي کسان اکثره بېوزله او کباړ ټولوونکي ماشومان وي.