تاند- له نن څخه ۲۲ کاله پخوا د ۲۰۰۲ د جنورۍ په لومړۍ نېټه یورو د اروپايي اتحادیې د ګډې کرنسۍ یا پولي واحد په توګه معرفي شوه او د ۲۰۰۳ تر مارچ پورې د دې اتحادیې په یو شمېر غړیو هیوادونو کې د یوازینۍ قانوني پولي واحد په توګه ومنل شوه.
جرمني، فرانسه، بلجیم، هسپانیا، هالنډ، فینلنډ، یونان، پرتګال، اتریش، ایټالیا، لوګزامبورګ او آیرلنډ لومړني هیوادونه وو چې د یورو چلښت پکې پیل شو.، دې ۱۲ هیوادونو خپلې ملي کرنسۍ ناچلې او یورو یې د راکړې ورکړې لپاره د خپل پولي واحد په توګه ومنلې. وروسته د اروپايي اتحادیې له ۲۸ غړیو څخه په ۱۹ کې د رسمي پیسو په توګه ومنل شوې.
د یورو سمبول یا نښه (€) ده. د یورو نوم په رسمي توګه، په مادرید کې د ۱۹۹۵ م کال، د دسمبر د میاشتې په مه ۱۶ نېټه ومنل شو.
د اروپا د واحدې کرنسۍ نظر لومړی پلا د فرانسې د اقتصاد پخواني وزیر ژاک دیلور د اروپايي کمیسیون د مشرتابه په مهال وړاندې کړ. نوموړی له ۱۹۸۵ څخه تر ۱۹۹۵ پورې د اروپايي کمیسیون ريیس و.
یورو، چې په ۱۰۰ سینټو وېشل شوې ده، د بهرنیو کرنسیو( اسعارو) په بازار کې د متحده ایالاتو له ډالرو وروسته دوهم لوی او دویم تر ټولو پراخه سوداګریزه کرنسي شمېرل کېږي.