تاند ( جمعه، د جدې ۸ مه) د افغانستان لپاره د قزاقستان سفير علیم خان یسین ګیلدییف د طالبانو د بهرنیو چارو وزارت له سرپرست مولوي امیرخان متقي سره په کتنه کې د دغه هېواد له لوري پر طالبانو د لګول شویو بنديزونو د لرې کیدو خبر ورکړی دی.
د ملا متقي دفتر د نوموړي له قوله لیکلي چې قزاقستان غواړي له افغانستان سره خپلې سوداګريزې او سیاسي اړیکې لا پراخې کړي.
د طاللبانو د اعلامیې له مخې، د قزاقستان سترې محکمې طالبان رسما د هغو تحریم شوو ګروپونو له نوملړ څخه ايستلي، چې دوی پرې په خپله خاوره کې د فعالیت بندیز لګولی دی.
په ورته وخت کې د بهرنيو چارو وزارت سرپرست په دغه کتنه کې د افغانستان او قزاقستان د اړیکو روان مسیر مثبت او دواړو ملتونو په ګټه وباله.
متقي د قزاقستان له حکومت څخه مننه وکړه، چې د دواړو هیوادونو تر منځ د شته خنډونو له منځه وړلو په برخه کې یې عملي اقداماتو ته مخه کړې.
د طالبانو چارواکي او رژیم لا هم د نړۍ د ډېرو هېوادونو په تور لېست کې شامل دي، خو له دې سره- سره یې چارواکي یو شمېر هېوادونو ته سفرونه کوي او ځینو هېوادونو د دوی رژیم سره تعامل کړی.