تاند ( جمعه، د جدې ۸ مه) د افغانستان د خبریالانو مرکز ویلي چې په ۲۰۲۳ میلادي کال کې یې افغان خبریالانو سره د تاوتریخوالي ۱۶۸ پېښې ثبت کړې دي.
د دغه مرکز د معلوماتو له مخې، په دې پېښو کې د یوه خبریال وژل کېدل او د نولسو نورو خبریالانو د ټپي کېدو او د اته اویا خبریالانو د بندي کېدو پېښې شاملې دي.
په دې راپور کې دا هم ویل شوي چې د ۲۰۲۲م کال په پرتله د سرغړونو دا پېښې یو څه کمې دي، وړم کال د سرغړونو دوه سوه شپېته پېښې ثبت شوې وې.
په دې کلني راپور کې دا هم ویل شوي چې د طالبانو چارواکي له رسنیو سره ډېرې کمې مرکې کوي او رسمي ویندویان یې د جدي او ژورو پوښتنو له ځواب ورکولو ډډه کوي.
طالب چارواکو په دې اړه څه نه دي ویلي، خو تر دې مخکې یې ویاندویانو له خبریالانو سره د ناوړه چلند تورونه رد کړي او ویلي چې د بیان ازادي او د خبریالانو لپاره د کار فضا یې د »« اسلامي شریعت» په چوکاټ کې رامنځته کړې ده.