تاند (پنجشنبه، د جدي ۷مه) اسلامي پراختیايي بانک اعلان کړی چې د خوړو د امنیت، روغتیا او روزنې په برخو کې یې د افغانستان لپاره د نږدې ۲۵ میلیونه امریکایي ډالرو د پروژو تړونونه لاسلیک کړي.
سرچینه زیاتوي چې له دغو پروژو څخه به ۲۴۰ زره افغانان برخمن شي.
ویل شوي چې په دغو پروژو کې د ښوونې روزنې، پاکو روغتیایی اوبو او میندو ته د مناسبو خوړو په برابرولو کې مرسته کیږي.
په دې تړاو زیات جزییات نه دي په ډاګه شوي.
په وروستیو کې په پرله پسې ډول د افغانستان بشري وضعیت د اندېښنې وړ ښودل کیږي او ورسره د مرستو پر زیاتوالي ټینګار کیږي، خو له دې سره خبرونه ښيي چې افغانستان سره د بشری مرستو لپاره بودیجه په کمېدو ده.
د طالبانو د کورنیو چارو وزیر سراج الدین حقاني تېره اوونۍ وویل چې نړیوال دې افغانستان سره بشري مرستې نه سیاسي کوي، کنه په وینا یې دلته د بشري ناورین وېره موجوده ده.
د طالبانو یو شمېر منتقدان بیا دوی ګرموي چې په افراطي کړنو یې افغانستان له نړۍ څخه منزوي کړی او بېوزله افغانان د دغه وضعیت لویه بیه پرې کوي.