تاند (پنجشنبه، د جدي ۷مه) په فراه کې په لومړی ځل د کتابونو د یوه نندارتون د ترسره کېدو خبر ورکړل شوی.
د دغه ولایت لپاره د طالبانو ځایي چارواکو ویلي چې یاد شوی نندارتون د تېرې سې شنبې په ورځ بیل شوی او نن پنجشنبه به پای ته ورسېږي.
د سرچینو له قوله، دا نندارتون د اطلاعاتو او فرهنګ ریاست د کتاب خپروونکو په مرسته ترسره کړی.
ویل شوي چې دا په دغه ولایت کې د کتابونو لومړنی نندارتون و.
فراه له هغو ولایتونو دی چې د سواد کچه پکې ټیټه وه او د جمهوري نظام پر مهال د اوږدو کلونو لپاره پکې د طالبانو جګړې روانې وې.
د کتاب لوستلو فرهنګ په عام ډول په افغانستان کې کم رنګه دی او تل له دې پلوه پر خلکو نیوکې کیږي چې له کتاب سره مینه نه ساتي.