تاند (پنجشنبه، د قوس ۳۰) د ملګرو ملتونو امنیت شورا تېره شپه د افغانستان په اړه ځانګړې غونډه لرله چې پکې له بېلابېلو ویناوو وروسته د طالبانو له واکمن رژیم څخه یو شمېر غوښتنې وشوې.
د ویناوالو په څرګندونو کې د افغان ښځو خلاف د طالبانو قیودات په جدي ډول نقد او دغه راز د نورو افراطي قیوداتو د اېسته کېدو او د افغانستان له خاورې د تروریزم د ادعا شویو خطرونو پر مخنیوي ټینګار وشو.
د ملګرو ملتونو د امنیت شورا یو شمېر دایمي او نا دایمي غړو د طالبانو له رژیم څخه وغوښتل چې په افغانستان کې خپل سیستماتیک جنسیتي تبعیض پای ته ورسوي.
د امنیت شورا د ښځو، سولې او امنیت د اصولو لپاره د ګډو ژمنو د اعلامیې لاسلیک کوونکو هېوادونو او د امنیت شورا راتلونکو غړو په یوه ګډ پرېکړه لیک کې چې د ډېسمبر په ۲۰مه یې د ملګرو ملتونو د امنیت شورا له ناستې وروسته خپور کړ، ویلي دي چې افغان نجونو او ښځو ته د هغوی د بشپړ بشري حقونه او اساسي ازادۍ ورکړل شي.
د طالبانو ویاندویانو او چارواکو دغو غوښتنو ته غبرګون نه دی ښودلی، خو تر دې مخکې یې د ښځو په ګډون د ټولو افغانانو د حقونو د تامینولو ادعا کړې او دا یې هم ویلي چې د دوی رژیم ټول ګډونه، قانونمند او د ټولو معیارونو پوره کوونکی دی.
څارونکي باور لري چې د طالبانو رژیم د افغانانو او نړیوالو پر وړاندې د افراطي او نه اصلاح کېدونکو دریځونو له دوام سره، ورځ تر بلې خپلې پښې په تېشه وهي، ځکه د دوی په باور نه افغانان او نه هم نړیواله ټولنه نوره د افغانستان د روان وضعیت د زغملو حوصله لري.