تاند (سې شنبه، د قوس ۲۸ مه) د بلخ د کونځلو غوړیو د تولید فابریکو یو شمېر مسوولان وایي چې له دغه ولایت څخه بهرنیو هېوادونو ته د کونځلو غوړیو قاچاق زیات شوی.
یو شمېر دغو کاروباریانو ویلي چې د غوړیو دا قاچاق په افغانستان کې د وچکالۍ له زیاتېدو او د کونځلو حاصلاتو له کمېدو سره زیات شوی.
ویل شوي چې د قاچاق له زیاتېدو سره په بلخ کې د کونځلو غوړیو بیه لوړه شوې ده.
د بلخ د کرنې او مالدارۍ ریاست لپاره د طالبانو رئیس شمس الله خالد بیا له دغه ولایت څخه د کونځلو غوړیو د قاچاق راپور رد کړی او ویلي چې دا موضوع واقعیت نه لري.
بلخ د کونځلو غوړیو د تولید نږدې ۱۵ فابریکې لري چې هر کال زرګونه کیلو د کونځلو غوړي تولیدوي.
ویل کیږي چې اوس دغه کاروبار هم د وچکالۍ او حاصلاتو له کمېدو سره زیانمن شوی.