تاند (سې شنبه، د قوس ۲۱مه) د امریکا د خزانې وزارت د بهرنیو شتمنیو د کنټرول ادارې د افغانستان د پخواني جمهوري نظام پر دوو چارواکو بندیزونه ولګول.
د امریکا د خزانې وزارت په دې تازه بندیزونو کې د افغانستان د ولسي جرګې پخوانی ريیس میررحمان رحماني او اجمل رحماني په نخښه شوي دي.
د امریکا خزانې وزارت د دواړو رحمانيانو پر ضد د بندیز د دلیل په اړه ویلي چې هغوی په پراخ فساد کې لاس درلود، د امریکا له لوري د افغان امنیتي ځواکونو د تمویل په قراردادونو کې یې میلیونونه ډالر وهلي او په دې توګه یې د ثبات لپاره هڅې زیانمن کړي دي.
د امریکا د خزانې وزارت پر اساس، دواړو رحمانیانو د قراردادونو د پړسولو، د وارداتو په مالیې کې د درغلۍ، د درغلیو په قضیو کې د لاس لرلو، د تېلو د غلاوو او په ولسي جرګه کې د درغلۍ په شمول په بیلابیلو او ګڼو برخو کې فساد کړی دی.
دا وزارت همداراز وايي چې میر رحمان رحماني د تېلو په قراردادونو کې بیې لوړې ښودلي، تېل یې بې مالیې وارد کړي او د مالیې پیسې یې خپل جېب ته اچولي او د غلا په پیسو یې ځان د افغانستان ولسي جرګې ته رسولی او حتي په رشوتونو یې ځان د ولسي جرګې ریاست ته رسولی دی.
د امریکا د خزانې وزارت وايي چې د رحماني د فساد شبکه ډېره پراخه ده او حتي تر جرمني، قبرس، متحده عربي اماراتو، استرالیا، هالنډ او بلجیم پورې رسیږي.
تر دې دوې ورځې وړاندې د امریکا د خزانې وزارت د بشري حقونو د ورځې او د بشري حقونو د نړیوالې اعلامیې د ۷۵ مې کلیزې په مناسبت د افغانستان په ګډون په څو نورو هېوادونو کې د شلو کسانو نومونه د بندیزونو نوملړ ته ورزیات کړل چې له بشري حقونو څخه په سرغړونه تورن دي.
په دې کسانو کې د طالبانو د حکومت د امر بالمعروف او نهي عن المنکر وزارت د سرپرست محمد خالد حنفي او د علومو اکاډمۍ د رئیس فرید الدین محمود نومونه هم شامل دي.
دا ندي ذکر شوي چې کوم بندیزونه ولګیدل، څه به ورسره کوي او ددوی غوندې په زرهاو نور غله هم شته چې د هغوی سره به څه کیږي.
داسی خپرونی د امریکا له خوا تکتیکی پالیسی دی او همدا چټله پالیسی د نورو ( چورکوونکیو قاتلانو تنظیمونو او طالبانو اعضاؤ ) مقابل کښی هم نظر و ضرورت ته صورت موندلۍ شی ، د مونږ ډیری خشباوری او خپلو مینځو کښی بدبینی موجودیت ددوی بادارانو ته ډیر ښه معلوم دی لدی کبله وخت په وخت افغانان په داسی اعلانونو مشغول ساتی !!!!