تاند (یکشنبه، د قوس ۱۲ مه) طبیعي پېښو ته د رسېدو په چارو کې د طالبانو د وزارت ویاند ملا جانان سایق وايي چې تېر کال د اقلیمي بدلون له امله نږدې ۲۰ میلیونه افغانان اغېزمن شوي.
سایق په تازه څرګندونو کې یې ویلي، د دې غمیزې په پام کې نیولو سره باید د اقلیمي بدلون نړیوالو غونډو کې د ګډون لپاره د افغانستان استازو ته هم بلنه ورکړل شي.
په پکتیکا او هرات کې درنې او مرګونې زلزلې، په ډېرو ولایتونو کې سېلابونه، پراخه وچکالي او ځینې نورې پېښې د طبیعي پېښو له تر ټولو لویو بېلګو ګڼل شوي.
افغانستان په وروستیو کلونو کې د اقلیمي بدلون له تر ټولو زیاتو زیانمنیدونکو هېوادونو ګڼل شوی.
د طالبانو چارواکي نیوکه لري چې نړیوال باید د اقلیمي بدلون اړوندو ناستو کې د دوی استازو ته د ګډون حق ورکړي.
دوی او یو شمېر افغان چاپېریال پوهان ټینګار لري چې نړیوال باید افغانستان سره په دې او نورو برخو کې سیاسي چلند ونه کړي.