تاند (یکشنبه، د قوس ۵ مه) راپورونه وایي چې د طالبانو د رژیم له بیا واکمنیدو راهیسې د دغه رژیم دویم سفیر هم چین ته رسیدلی .
په راپورونو کې نوی ټاکل شوی سرپرست سفیر بلال کریمي یاد شوی.
کریمي مخکې د طالبانو د ویاند مرستیال و.
طالبانو ته ځینو نږدې سرچینو پرون رسنیو ته ویلی، چې نوموړی د چین پلازمېنې پیکنګ ته رسېدلی او ډېر ژر به خپله دنده رسماً پیل کړي.
که څه هم د نړۍ یوه هېواد هم د طالبانو حکومت په رسمیت نه دی پېژندلی خو د پاکستان، ترکیې، روسیې او ځینو نورو هېوادونو تر څنګ چین، د طالبانو ډیپلوماتان منلي دي.
چین له لومړنیو هېوادونو څخه و چې په افغانستان کې یې د جمهوري نظام له سقوط وروسته، په خپله خاوره کې د افغانستان د سفارت واک د طالبانو د رژیم معرفي کړي سرپرست ته وسپاره.
له دې سره، د طالبانو پر ګومارنو ځینې نیوکې هم شوي او ویل شوي چې د دغه رژیم ګومارنې نیږدې ټولې غیر مسلکي او پر انډیوالۍ او ډلبازۍ ولاړې دي.