تاند (پنجشنبه، د قوس ۲ مه) دوو امریکايي عکاسانو د افغان ماشومانو داسي تصویر چمتو کړی چې د دوی په وینا یو میلیون ډالره ارزښت لري او غواړي د دې تصویر له درکه ترلاسه کړې پیسې پر جنګ خپلو افغان ماشومانو ولګوي.
ټامس راموس او کین اوسبرن چې له کلونو راهیسې په ټکساس ایالت کې په خپله ستودیو کې د عکسونو پر جوړولو کار کوي، دا ځل د افغان ماشومانو یو ځانګړی تصویر جوړ کړی چې په جګړه او کړاونو کې ښکېل دي.
دا تصویر د عکاسۍ او انځورګرۍ ګډوله ده.
دوی دواړه څلور کاله پخوا د دې تصویر لپاره افغانستان ته لاړل او د هغه پر جوړولو یې دوه کاله کار وکړ.
کین اوسبرن وايي:«موږ غوښتل چې یو نړیوال سمبول جوړ کړو چې په افغانستان کې د کورنیو او جنګ ځپلیو ماشومانو د ژوند سختۍ انځور کړي. موږ له ماشومانو سره د مرکو لپاره ډېرو خطرناکو سیمو ته سفرونه وکړل او هغوی مو له نژدې ولیدل.»
توماس راموس او کین اوسبرن په ۲۰۱۹ کې د افغانستان شمال ته لاړل او د هغو ماشومانو بوټونه یې راټول کړل چې د کورنۍ غړي یې وژل شوي او دوی د خپلو کورونو پرېښودو ته اړ شوي وو.
دوی له دغو بوټونو څخه د جنګ ځپلیو ماشومانو د سمبول په توګه عکسونه واخیستل او بیا یې له هغو څخه تصویر جوړ کړ.
تامس راموس وايي:«په دې تابلو کې له ۲۴ تولې سره زرو، پلاتونیم او پلاډیم څخه کار اخیستل شوی او د جوړښت او ارزښت له نظره د نړۍ تر ټولو ستر انځور دی.»