تاند(چهارشنبه، د عقرب ۲۴ مه) د اطلاعاتو او کلتور وزارت لپاره د طالبانو چارواکو د لوحو او تابلوګانو د اصلاح کمېسیون ټاکلی او دغه کمیسیون خپلې چارې پيل کړي.
د کمیسیون چارواکو د هټیو، سوداګریزو مرکزونو، استوکنځيو او بنسټونو له خاوندانو غوښتي چې د لوحو او تابلوګانو د اصلاح په برخه کې چې پر بهرنیو ژبو او غیر معیاري بڼو جوړې شوې دي پاملرنه وکړي.
دغه کمېسیون په یوه مکتوب کې ویلي چې دغه پرېکړه د کلتوري شتمنیو او د هېواد د ملي ژبو د خوندیتوب په پار نیول شوې ده او ټول یاد شوي بنسټونه ۱۵ ورځې وخت لري چې د غیرمعیاري لوحو د بدلون لپاره اقدام وکړي.
یو شمېر فرهنګي فعالانو د کمیسیون د کار د پيل هرکلی کړی، او ویلي یې دي هیله لري چې دا کمیسیون به د لوحو ژبني سمون ته پام وکړي.
دوی همداراز هیله لري چې د ښارونو د کوڅو او واټونو لپاره نومونه غوره شي.