تاند:( شنبه، د عقرب ۲۰ مه) امریکا متحده ایالاتو او هندوستان په یوه ګډه اعلامیه کې یو ځل بیا پر افغانستان د طالبانو له واکمن رژیم څخه خپلې ګډې غوښتنې تکرار کړې دي.
په نوې ډېلۍ کې د دواړو هېوادونو د لوړپوړو چارواکو له یوې ګډې غونډې وروسته په خپره شوې اعلامیه کې راغلي، چې دواړه هېوادونه له طالبانو پر کړو ژمنو عمل او د افغانستان له خاورې هېڅ ډلې ته د نورو خلاف د نه استفادې ډاډمنیدل غواړي.
په اعلامیه کې له طالبانو څخه د ښځو، ماشومانو او نورو قشرونو د حقونو تامین هم غوښتل شوی.
دغو هېوادونو یو ځل بیا په افغانستان کې د سولې د ټینګښت لپاره د یوه پراخ بنسټه چوکاټ رامنځته کیدل اړین ګڼلي دي.
طالبانو دغو غوښتنو ته غبرګون نه دی ښودلی، خو مخکې یې ټینګار کړی چې د دوی رژیم ټول شموله او د ټولو افغانانو د حقونو تامینونکی دی.
دوی دغه راز له نورو هېوادونو غوښتي، چې له داسې څرګندونو ډډه وکړي، ځکه د دوی په باور د افغانستان په کورنیو چارو کې لاسوهنه ده.
ورته غوښتنې په پراحه کچه افغانان هم له طالبانو لري، خو طالبانو ورته پاملرنه نه ده کړې.