تاند (دوشننبه، د عقرب ۱۵مه) د ازبکستان ولسمشر شوکت میرزایوف د ترکي دولتونو د سازمان په لسمه سرمشریزه کې د وینا پر مهال ټینګار وکړ چې د سیمې د ثبات او امنیت لپاره په افغانستان کې سوله اساسي شرط دی.
د ازبکستان د ولسمشرۍ دفتر په خپره شوې اعلامیه کې راغلي: “د افغانستان په څو توکمیزه سیمه کې د سولې او ارامۍ رامنځته کول، چې له زرګونو کلونو راهیسې د ترکي قومونو له تاریخي او کلتوري اړیکو سره تړاو لري، زموږ په سیمه کې د ستراتیژیک ثبات او امنیت د تامین اصلي شرط دی.”
د هغه په وینا، په نورو هېوادونو کې د جګړو له شدت سره ورځ تربلې افغانستان د نړیوالو له پاملرنې غورځي.
د ازبکستان ولسمشر ټینګار وکړ، چې په افغانستان کې د ټولنیزو او نورو ستونزو د حل لپاره باید هڅې وشي.
هغه په مشخص ډول نه دي ویلي، چې د سولې او ثبات د تامین او د ټولنیزو ستونزو د حل لپاره په افغانستان کې څه کول په کار دي؟
ازبکستان د طالبانو د واکمن رژیم له نږدې متحدینو څخه دی، چې په وروستیو کې یې ورسره د اورپټلۍ پروژه هم پيل کړې او ولسمشر یې په خپله تازه وینا کې هم د دغې پروژې پر عملي کولو ټینګار وکړ.
د افغانستان وروستني ولسمشر محمد اشرف غني هم په خپله وروستۍ وینا کې ویلي، چې افغانستان نور د نړیوالې ټولنې د پاملرنې په سر کې ځای نه لري.