تاند (یکشنبه، د عقرب ۱۴مه) پاکستان سره د اړیکو د ترینګلتیا له زیاتوالي سره هم مهاله، د طالبانو د ریاست الوزرا اقتصادي مرستیال ملا عبدالغني برادر تهران ته د خپل سفر پر مهال د ایران د بهرنیو چارو له وزیر حسین امیر عبداللهیان سره لیدلي او د ایران له لارې یې د افغانستان د وارداتو او صادراتو پر زیاتوالي خبرې ورسره کړې دي.
. د ملا برادر دفتر په یوه اعلامیه کې ویلي، چې په دې کتنه کې په سیاسي، اقتصادي، تعلیمي، فرهنګي او نورو برخو کې پر ګډو همکاریو خبرې وشوې.
سرچینه زیاتوي ، د طالبانو تر ولکې لاندې افغانستان غواړي چې د ایران له لارې خپل صادرات او واردات زیات کړي او په دې برخه کې یې له ایرانه د ملاتړ غوښتنه کړې ده.
ملا عبدالغني برادر د طالبانو د یوه هیئت په مشرۍ پرون شنبه تهران ته لاړ.
د ملا برادر د سفر په اجنډا کې د افغان کډوالو پر وضعیت خبرې نه دي شاملې.
ایران هم د میلیونونو افغان کډوالو کوربه دی او وخت په وخت ترې دغو کډوالو سره د ناوړه چلند خبرونه ورکول کیږي.