تاند (یکشنبه، د عقرب ۱۴مه)د ملګرو ملتونو د نشه يي توکو او جرمونو پر وړاندې د مبارزې ادارې د یوه نوي راپور په خپرولو سره اعلان وکړ چې د طالبانو د واکمنۍ پر مهال په افغانستان کې د کوکنارو په کښت کې ۹۵ سلنه کموالی راغلی دی.
د راپور له مخې، له دغه کمښت سره افغان کروندګرو تر یو میلیارد ډالرو زیات تاوان کړی دی.
“UNODC” ویلي، چې په ۲۰۲۳ کال کې، په ټول افغانستان کې، د کوکنارو د کښت کچه ١٠ زره او ٨٠٠ هکتار ځمکې ته رسېږي، په داسې حال کې چې دا شمېر تېر کال له ٢٣٢ زره هکتارو څخه ډیر و.
د ملګرو ملتونو د نشه يي توکو او جرمونو پر وړاندي د مبارزې دفتر لیکلي، چې په ۲۰۲۳ کال کې د هغو بزګرانو د عاید کچه چې پر سوداګرو یې تریاک پلورل، ۹۲ سلنه کمه شوې ده.
یو شمېر افغان کروندګرو هم وخت په وخت شکایت کړی، چې طالبانو پرې د کوکنارو کرل بند کړي، خو د بدیلو کښتونو تیاری یې ورته نه دی نیولی.