تاند (شنبه، د عقرب ۱۳ مه) د طالبانو د ریاستالوزرا اقتصادي مرستیال ملا عبدالغني برادر اخوند په مشرۍ د دوی یو لوړ پوړي پلاوي د ایران په بلنه تهران ته سفر وکړ.
د ملا برادر دفتر وايي، چې دغه پلاوی به په دې سفر کې له ایراني چارواکو سره د دوه اړخیزو اړیکو، سوداګرۍ، ترانزیټ، ترانسپورټ، زېربناوو، رېل پټلۍ، سیمه ییز اتصال، چابهار بندر له لارې د سوداګرۍ پر زیاتوالي، په دې بندر کې د افغانستان د ښکېلتیا د پراخېدو او د دواړو هېوادونو ترمنځ د اقتصادي همکاریو د پراختیا په اړه خبرې اترې وکړي.
سرچینه زیاتوي: ملا برادر به همداراز په دې سفر کې د ایران دولت او خصوصي سکټور په افغانستان کې د کرنې، کانونو، ترانسپورټ او صنعت سکټور کې پانګونې ته راوبولي.
د ملا برادر په سفر کې له ایراني چارواکو سره د افغان کډوالو پر وضعیت د خبرو په تړاو څه نه دي ویل شوي.
د پاکستان ترڅنګ ایران هم له افغان کډوالو سره په ناوړه چلند تورن دی، خو طالب چارواکو د یاد شوي هېواد د دغه چلند په اړه څه نه وایي.