تاند (شنبه، د عقرب ۱۳ مه) له پاکستان څخه د افغان کډوالو د جبري اېستو د عملیاتو له دوام سره، په دغه هېواد کې سلګونه هغه افغان خبریالان سخت وېریدلي چې د طالبانو له لاسه هېواد پرېښودو ته اړ شوي او پاکستان نه نورو هېوادونو ته د تلو کېسونه تعقیبوي.
یو شمېر دغو خبریالانو چې نه یې غوښتل نومونه یې خپاره شي، تاند ته ویلي چې په پاکستان کې د استوګنې د قانوني اسنادو له لرلو سره بیا هم وېره لري چې یو شمېر نورو اسناد لرونکو افغانانو غوندې به په زوره هېواد ته ستانه کړل شي.
د دوی په وینا، اندېښمن دي چې د پاکستان د حکومت دا عملیات به طالبانو سره په همغږۍ وي او هېواد ته ستنولو سره به د طالبانو له شکنجو او زندانونو سره مخ شي.
که څه هم د طالبانو رژیم په یوه اعلامیه کې د دوی له وېرې جلا وطن شویو افغانانو ته د ډاډمن ستنیدو ډاډ ورکړی، خو د بې پولې خبریالانو د ټولنې په ګډون بېلابېل نړیوال بنسټونه د نورو خطر ځپلو افغانانو ترڅنګ د خبریالانو د هېواد ته ستنولو په تړاو اندېښمن دي.
د بېپولي خبریالانو ټولنه وايي، په پاکستان کې نږدې ۲۰۰ افغان خبریالانو ته له دې هېواده د شړلو ګواښ شوی دی.
دې ټولنې په یوه اعلامیه چې پرون ناوخته یې خپره کړې لیکلي، دا خبریالان د پاکستاني پولیسو لهخوا د ځورونې، وهلو، خپلسرې نیولو او د کورونو د مالکانو لهخوا له کوره د ویستو سره مخ شوي.
د بېپولې خبریالانو د ټولنې په اعلامیه کې په زوره د هغو افغان خبریالانو بېرته ستنول چې پاکستان ته د امنیتي ګواښونو له امله تللي، د نړیوالو قوانینو ښکاره سرغړونه بلل شوې او زیاتوي، دا عمل په بشپړه توګه د منلو وړ نهدی.
په اعلامیه کې زیاته شوې، افغانستان ته د دغو خبريالانو بېرته لېږل به د دوی ژوند له خطر سره مخامخ کړي
د بېپولې خبریالانو ټولنې د پاکستان په حکومت غږ کړی چې د افغان خبریالانو له نیولو ډډه وکړي او تر خوا یې په پاکستان کې دې د هغوی د ساتنې او امنیت ضمانت وکړي.
دا په داسې حال کې ده، چې ویل کیږي یو شمېر افغان خبریالان او د مختلفو قشرونو فعالان لا هم د طالبانو په زندانونو کې دي او له ستونزو ډکې بې برخلیکه شېبې تېروي.
طالبان بیا په دې اړه تورونه بې اساسه بولي.