تاند:( شنبه، د میزان ۶مه) د کندهار د سوداګرۍ او پانګونې خونې مسولین وایي، چې سږ کال له کندهار څخه پاکستان او هند ته د ۱۵ میلیونه او ۴۶ زره ډالرو په ارزښت ۲۸ زره ۳۴۳ ټنه انګور صادر شوي دي.
د یادې خونې د مسوولینو په وینا؛ سږ کال له دې ولایت څخه د انګورو صادرات د تېر کال په پرتله دوه برابره ډېر دي.
طالب چارواکو تر دې مخکې د انارو په حاصلاتو کې هم د زیاتوالي خبر ورکړی و.
دا په داسې حال کې ده چې د کندهار په ګډون د بېلابېلو ولایتونو کروندګر او بڼوال وخت په وخت له حاصلاتو، عوایدو او کرنیزو امکاناتو له کموالي شکایتونه کوي او د چارواکو پاملرنه غواړي.
دوی شکایت کوي، چې طالب چارواکي ترې عشر او مالیه اخلي خو د ستونزو حل ته یې توجه نه لري.
طالب چارواکي بیا په دې اړه د ممکنه هڅو خبر ورکوي.