تاند(پنجشنبه، د میزان ۴ مه) د طالبانو ویاند ذبیح الله مجاهد وایي چې د دوی رژیم افغانستان له بهر څخه د راستنېدونکو کډوالو ستونزو ته د رسېدو په موخه عالي کمېسيون جوړ کړ.
ذبيح الله مجاهد د يوې خبرپاڼې په خپرولو سره ويلي، چې دغه کمېسیون تر هغه وروسته جوړ شو، چې د پاکستان حکومت د ټولو نورمونو خلاف د افغان کډوالو د اېستلو فیصله وکړه.
په خبرپاڼه کې زياته شوې:( له پاکستان او نورو هېوادونو څخه په جبري توګه د را اېستونکو افغان کډوالو ستونزو ته د رسېدنې په موخه د ریاست الوزراء د اداري مرستیال مولوي عبدالسلام حنفي په مشرۍ د ۳۱ لوړ رتبه مسئولینو په شمول عالي کمېسیون جوړ شو او اسلامي امارت د خپلو امکاناتو په محدوده کې د لومړنیو خدماتو وړاندې کولو په موخه په ۸ فصلونو او ۳۱ مادو کې کړنلاره توشیح او د یادې کړنلارې د تطبیق لپاره یوه دارالانشاء او ۱۲ کمیټې منظورې کړې).
مجاهد همدارنګه ويلي، چې یادې کمیټې به خپلو امکاناتو ته په کتو د کډوالو تثبیت، تشخیص، انتقال، لومړني ا صحي خدمات او موقت پنډغالي چمتو کوي.
سرچينې زياته کړې، چې په ځانګړي ډول سوداګرو او صنعتکارانو ته د یوې کړنلارې له مخې ځانګړې اسانتیاوې په نظر کې نیول شوې دي.
په خپره شوې خبرپاڼه کې همدارنګه ويل شوي:(هغه هېوادوال، چې د ځینو تشویشونو له امله بهرنیو هېوادونو ته تللي، هغوی ته ډاډ ورکوو، چې پرته له کوم تشویش څخه بېرته راستانه او په خپل هېواد کې باعزته ژوند وکړي).