تاند:(یکشنبه، د میزان ۲۳مه) په هرات کې نن دوو لویې او دوې کوچنۍ زلزلې وشوې چې د سرومال تاوانونه یې اړولي دي.
د طالبانو ځایي چارواکو په نننۍ زلزله کې د یو تن د مړینې او نږدې ۳۵ نورو د ټپي کیدو ویلي. خو د روغتیا نړیوال سازمان وايي چې لږترلږه ۱۲۰ تنه ټپیان د هرات روغتونو ته رسول شوي دي.
دا لومړني ارقام ګڼل کیږي او احتمال شته، چې تغیر پکې راشي.
د امریکا د جیالوجیکي سروې اداره وايي چې نن په هرات کې څلور زلزلې شوي چې تر ټولو زوروره یې ۶ اشعاریه ۳ ریښتره وه، دوهمه زلزله ۵ اعشاریه ۳ وه. دوې نورې کمزورې وې.
د نننۍ زلزلې مرکز له هرات ښاره ۳۰ کیلومنتره لېرې تر مځکې شپږ نیم مایله لاندې و.
په هرات ولایت کې د تېرې اوونۍ د شنبې له راهیسې زلزلې کیږي.
د ملګروملتونو په وينا هرات کې د تېرې اوونۍ د زلزلې له امله تر ۱۳۰۰ ډېر کسان مړه او زرګونه بېکوره شول.
نن له فراه ولایت څخه هم د زلزلې د ټکانونو خبر ورکړل شوی.