تاند (سې شنبې، د میزان ۱۸ مه) د بامیانو د مرکز په توپچي سیمه کې د یوې ترافیکي پېښې له کبله ۱۲ کسانو ته مرګ ژوبله اوښتې ده.
د دغه ولایت لپاره د طالبانو د والي مطبوعاتي مسوول صبور فرزان سیغاني وویل چې دغه پېښه د مرکز په توپچي سیمه کې د ټوربو او فلانکوچ موټر د ټکر له امله رامنځته شوې چې په کې ۴ تنه مړه او د دوو ماشومانو په ګډون په کې ۸ تنه ټپیان شوي دي.
سیغاني زیاته کړه، چې د دوی امنیتي ځواکونه د پېښې ځای ته پر وخت رسېدلي او ټپیان یې ولایتي روغتون ته لېږدولي چې روغتیایی وضعیت یې د ډاډ وړ ښودل شوی دی.
د نوموړي پېښې د رامنځته کېدو د لامل په تړاو څه ونه ویل خو له دې وړاندې دې ورته ډېری پېښې د موټر چلوونکو د بې احتیاطۍ له مله رامنځته شوې دي.
مخکې له جګړې وروسته ترافیکي پېښې په افغانستان کې د انسانانو په وسیله د مرګ ژوبلې تر ټولو اصلي دلیل ګڼل کیده، خو اوس د جګړو له پای ته رسیدو سره ترافیکي پېښې د هغو پېښو په سر کې دي، چې د انسانانو له بې غورۍ رامنځته کیږي او ډېرو افغانانو ته مرګ ژوبله اړوي.